POU GWU: STQARRIJA - Tgħawwiġ ta' fatti mill-Malta Independent u Net News

Il-bieraħ 10 ta' Marzu filgħodu kmieni l-ġurnal online www.independent.com.mt tella' intervista li l-preżentatur Pierre Portelli għamel lill-President tal-POU-GWU l-Ispettur Sandro Camilleri fuq il-programm INDEPTH. L-intervista ppubblikata kienet titratta diversi suġġetti u fost l-oħrajn issemma kemm tagħmel ħsara meta tidħol il-politika partiġjana fuq il-post tax-xogħol, b'nies li ġieli jippretendu li għax ikollhom il-partit li jappoġjaw fil-gvern jippretendu li jagħmlu li jridu. Naturalment dan kien qed jingħad f'kuntest ta' kull żmien u mhux biss għaż-żmien preżenti.

Minkejja li l-Ispettur Sandro Camilleri kien ċar, it-titlu tal-artiklu online kien 'political influence in police force very big, hinders investigations - Inspector Camilleri'. It-titlu tal-artiklu jtik l-impressjoni li l-President tal-unjin qal li l-politiċi jużaw l-influwenza tagħhom biex jimpedixxu l-membri tal-Korp milli jagħmlu xogħolhom. Kulma kien qal il-President tal-unjin hu li ċertu diskors bejn il-Pulizija dwar politika partiġjana jagħmel aktar ħsara fuq il-post tax-xogħol. Bħala eżempju qal li mill-lum hemm nies li diġa qalulu li jekk jinbidel il-gvern ser jispiċċa Kemmuna.

Ftit sigħat wara kien imiss il-ġurnal online netnews.com.mt miktub minn Mario Frendo li kompla jżid id-doża ta' tgħawwiġ ta' fatti fejn tella' artiklu bit-titlu "l-indħil politiku fil-Pulizija qed jagħmel ħsara kbira - Sandro Camilleri". Prattikament dan il-ġurnal qaleb l-istess verżjoni mill-ingliż għall-Malti bl-istess intenzzjoni ta' qerq biex jagħti x'jifhem li Camilleri qal li l-politiċi ma jħallux lill-Pulizija taħdem kif suppost.

Sfortunatament dawn iż-żewġ ġurnali huma fost l-aktar voċiferi biex jagħmlu kampanja kontra l-korp tal-Pulizija u l-membri fi ħdana. Dan l-aġir huwa kundannabbli u tappella lill-ġurnalisti biex ikunu ġusti fir-rappurtaġġi tagħhom.

Hawn taħt ara dak li verament qal il-President tal-POU-GWU l-Ispettur Sandro Camilleri